DC chuan MPSC hnuaia District Level Examination Centre hawn a ni ta  chu lawmawm a tih thu  sawiin Saitual District khawpui ngeia sawrkar hna sang ber lak tur exam theih a ni ta chu hmasawnna ropui tak a ni a ti. 

MPSC hnuaia sorkar hna chi  hrang hrangte pawh exam theih a nih tawh dawn thu leh chu chuan nasa takin saitual district thalaite hna exam kawngah a puih tur thu a sawi a, DC chuan sawrkar hnathawk mi  engemaw zatin an hnathawhna hmun atanga MCS combine prelims an exam thei ta chu lawmawm a tih thu a sawi bawk.

Exam Centre hi Govt Higher Secondary School Building, Saitual niin vawiinah vek hian exam neih nghal a ni a, exam bei tura inziaklut mi 44 ah mi 29 in an exam thei a, heng zingah hian Mipa 18 leh Hmeichhia 11 in an exam a ni. Exam hi chawhma leh chawhnu ah darkar 2 ve ve  Paper I leh II  an exam ang. Exam beitu zingah District chhung mi leh sa bakah hmun dang atanga Saituala sawrkar hnathawka awm mek engemaw zat an awm bawk.